Chief Minister chuan, Lunglei mipuite duh em em Mizoram State University hmunpui tur hi Lungleia dah tum a ni, a ti. Mizoram State University Bill, Assembly lama lo pass tawhah Aizawlah a hmunpui dah tura lo tih fel vek lo ni mah se, Lunglei leh chhim lam mipuiten Lungleiah awm se an duh tih kan hria a. Chuvang chuan, dan chu a tul anga siamthat (amend) leh mai pawh huamin Lungleiah a hmunpui dah hi kan tum ta a ni, a ti. He mi chungchang hi Chief Minister hian chiang zawkin Lungleiah hian Press Conference a nei ang.

R. Lalrochama, Member, HPC chuan HPC aiawhin Mizoram sorkar chungah lawmthu a sawi a. Mizoram Engineering College, Pukpui a taka kalpui tawh tura sorkar hmalaknaah te, Lunglei Water Supply tihhmasawnna thawh mek te, Aizawl - Thenzawl - Lunglei Road atana sorkar hmalaknaah te lawmthu a sawi a. Mizoram State University hmunpui Lungleia dah hi mipui tam takten Pathian hnenah tawngtaiin kan dil thin a. A taka tihhlawhtlin a ni dawn tih vawiinah kan han hre ta hi kan hlim hle a ni, a ti.

Vawiin meeting hian Lunglei Bypass Road sialna tur hmalakna an thlir ho va, a bawh zui zel dan tur an rel a. Serkawn Bazar Shed sak thar thu te, Lungleia Cooperative Training Centre din te, Govt. Lunglei College tihhmasawnna tur te an sawi hova. Mizoram chhim lamin Airport a neih ve theihna tura hmalaknate pawh sawiin Chief Minister hian Mizoram chhim lam leh khaw chhak lama Airport siam belhna tur ram thlithlai mek a nih dan a sawifiah a ni.

Heng bakah hian High Powered Committee kalphung tha zawk a awm theih nana thil pawimawh dangte an rel a, an thurelte bawhzui dan turte an ruahman bawk a ni.

Meeting-ah hian B. Lalchhanzova, Minister, IPR, P&S, Lalramliana Papuia, MLA, T. Lalhlimpuia, MLA leh HPC members te, Navneet Mann, IAS, Member Secretary te an tel niin sorkar thuchhuah chuan a tarlang.